🐯🌿 ताडोबा-अंधारी व्याघ्र प्रकल्प मधील लोहारा गेटला पर्यटकांचा उत्स्फूर्त प्रतिसाद; प्रादेशिक (बफर) विभागात पर्यटनाला नवी चालना

🐯🌿 ताडोबा-अंधारी व्याघ्र प्रकल्प मधील लोहारा गेटला पर्यटकांचा उत्स्फूर्त प्रतिसाद; प्रादेशिक (बफर) विभागात पर्यटनाला नवी चालना

दुर्योधन घोंगडे मुख्य संपादक लोकवाद : चंद्रपूर जिल्ह्यातील जागतिक कीर्तीच्या ताडोबा-अंधारी व्याघ्र प्रकल्प अंतर्गत नव्याने सुरू करण्यात आलेले लोहारा गेट पर्यटकांसाठी खुले होऊन तब्बल एक महिना पूर्ण झाला असून पर्यटकांचा उत्स्फूर्त प्रतिसाद मिळत आहे. या कालावधीत हजारो पर्यटकांनी लोहारा गेटमार्गे सफारीचा आनंद घेतला आहे. जिल्ह्याला लागून असलेल्या या प्रवेशद्वारामुळे पर्यटकांना ताडोबा सफारीसाठी आणखी एक सोयीस्कर पर्याय उपलब्ध झाला आहे.

लोहारा गेट हे प्रादेशिक (बफर) विभागात येत असून येथे वन्यजीवांचे समृद्ध दर्शन घडत आहे. वाघ, बिबट्या, रानगवा (गौर), अस्वल, सांबर, चितळ, नीलगाय, रानडुक्कर यांसारखे विविध वन्यप्राणी पर्यटकांना पाहायला मिळत आहेत. याशिवाय मोर, गरुड, ससाणे तसेच विविध स्थलांतरित पक्ष्यांमुळे पक्षीप्रेमींसाठीही हा परिसर आकर्षणाचे केंद्र ठरत आहे.

अलीकडील काही सफारीदरम्यान पर्यटकांना वाघ तसेच वाघिणीसह तिच्या बछड्यांचे दर्शन झाल्याने पर्यटकांमध्ये विशेष उत्साह निर्माण झाला आहे. हिरव्यागार वनराईतून शांत व निसर्गरम्य वातावरणात होणारी सफर पर्यटकांसाठी संस्मरणीय अनुभव ठरत आहे.

दरम्यान, लोहारा गेट परिसरात पर्यटकांच्या सोयीसाठी रेस्टॉरंट लवकरच सुरू होणार असल्याची माहिती मिळत आहे. त्यामुळे पर्यटकांना सफारीसोबतच स्थानिक खाद्यपदार्थांचा आस्वाद घेण्याची सुविधा उपलब्ध होणार असून पर्यटनाला आणखी चालना मिळण्याची अपेक्षा आहे.

लोहारा गेट सुरू झाल्याने स्थानिक युवकांना मार्गदर्शक, जीप चालक, रिसॉर्ट व्यवसाय, खानपान सेवा आदी क्षेत्रांत रोजगाराच्या संधी निर्माण झाल्या आहेत. त्यामुळे लोहारा गावासह परिसरातील स्थानिक अर्थव्यवस्थेला बळकटी मिळत असल्याचे दिसून येत आहे.

वनविभागाकडून पर्यटकांनी सफारीदरम्यान नियमांचे पालन करावे, सुरक्षित अंतर राखावे आणि स्वच्छता राखण्यास सहकार्य करावे, असे आवाहन करण्यात आले आहे.

दरम्यान, चंद्रपूर जिल्ह्याला लागून असलेल्या ताडोबा सफारीतील प्रादेशिक वन विभागाच्या नव्याने सुरू झालेल्या लोहारा गेटच्या व्यवस्थापनासाठी वन विभागाचे अधिकारी व कर्मचारी प्रयत्नशील आहेत. उपविभागीय वनपरिक्षेत्र अधिकारी (DFO) ओ. पी., वनपरिक्षेत्र अधिकारी राजन तलमले, घनश्याम नायगमकर, यांच्या मार्गदर्शनाखाली वनपाल तिजारे, वनरक्षक रुपेश बैलमवार, तसेच वनमजूर व गाव समितीचे मोलाचे सहकार्य लाभत आहे.

जिल्ह्याला लागून असलेले हे गेट भविष्यात ताडोबा सफारीसाठी येणाऱ्या पर्यटकांसाठी एक महत्त्वाचे केंद्र ठरणार असून, येत्या काळात येथे पर्यटनाची वाढ होण्याची अपेक्षा व्यक्त केली जात आहे.