🔴 गॅस सिलेंडर वाटपातील गोंधळावर प्रशासनाचा मोठा निर्णय; आता ‘बुकिंग डेट’नुसारच वितरण

🔴 गॅस सिलेंडर वाटपातील गोंधळावर प्रशासनाचा मोठा निर्णय; आता ‘बुकिंग डेट’नुसारच वितरण

मुल (दि. 21 एप्रिल 2026):

मुल शहरात गॅस सिलेंडर वाटपात सुरू असलेल्या गोंधळ आणि विलंबानंतर अखेर प्रशासन जागे झाले असून तहसीलदार कार्यालयात झालेल्या बैठकीत महत्त्वाचा निर्णय घेण्यात आला आहे.

आता ग्राहकांनी ज्या तारखेला गॅस बुकिंग केले आहे, त्याच तारखेप्रमाणे आणि क्रमाने सिलेंडरचे वितरण करण्यात येणार आहे. गॅस एजन्सीकडून मिळणारी बुकिंग यादी तहसील कार्यालयामार्फत दररोज प्रसिद्ध केली जाणार असून त्यानुसारच वाटप होईल.

दरम्यान, बुधवार (दि. 22 एप्रिल) रोजी दुपारी 3 वाजता क्रीडा संकुल, मुल येथे विशेष वितरण करण्यात येणार आहे. त्यानंतर रविवार वगळता इतर दिवशी आठवडी बाजार परिसरात नियमित वितरण सुरू राहील.

सिलेंडर घेण्यासाठी येताना ग्राहकांनी गॅस पासबुक, आधार कार्ड आणि मोबाईलवरील बुकिंग OTP सोबत आणणे अनिवार्य करण्यात आले आहे. वितरण प्रक्रियेत अडथळा निर्माण करणाऱ्यांवर Essential Commodity Act अंतर्गत कठोर कारवाईचा इशारा प्रशासनाने दिला आहे.

प्रशासनाच्या माहितीनुसार, प्रलंबित सर्व गॅस वितरण पुढील 10 ते 12 दिवसांत पूर्ण करण्यात येणार असून त्यानंतर घरपोच सेवा सुरू करण्याबाबतही विचार केला जाणार आहे.