कोणसरीत लॉयड मेटलचा दादागिरी-प्रशासकीय संगनमत? मानसिक छळ, खोटे ठराव, नोटिसांच्या तगमगीने दोन मृत्यू; तहसीलदार व SDOच्या दबावावर ग्रामस्थांचा संताप

सोनू वाळके,उपसंपादक, लोकवाद न्युज.

कोणसरीत लॉयड मेटलवर गंभीर आरोप —

शेतकऱ्यांवर मानसिक दडपण, खोट्या ठरावांद्वारे जमीन हस्तगत करण्याचा प्रयत्न;

नोटिसांच्या तगमगीमुळे दोन जणांचा मृत्यू, ग्रामस्थांत संताप

“तहसीलदार आणि उपविभागीय अधिकारी शेतकऱ्यांची बाजू सोडून लॉयड मेटलच्या दलालीला प्राधान्य देत आहेत का? प्रशासन शेतकऱ्यांसाठी काम करतंय की प्रायव्हेट कंपनीच्या दबावाखाली नांगर ओढतंय — हा प्रश्न आता गावागावात पेट घेतोय!”

              प्रेस नोट

कोणसरी (चामोर्शी तालुका) – लॉयड मेटल (Lyod Metal) कंपनीच्या कामामुळे गेल्या काही महिन्यांपासून सुरू असलेल्या तणावाला भीषण वळण लागले आहे. शेतकऱ्यांवर होत असलेल्या कथित दडपशाही, जमीन हस्तगत करण्यासाठी बनावट कागदपत्रांचा खेळ, आणि वारंवार नोटिसांमुळे झालेल्या प्रचंड मानसिक तणावाचे भेदक परिणाम म्हणून दोन जणांचा अकस्मात मृत्यू झाल्याचा ग्रामस्थांनी धक्कादायक आरोप पत्रकार परिषदेत केला.

कोणसरीतील शेतकऱ्यांनी लॉयड मेटल कंपनीला शेती देण्यास ठाम नकार दिला आहे. “पिढ्यान्‌पिढ्या आमचा उदरनिर्वाह या जमिनीवर चालला आहे; हीच आमची खरी संपत्ती आहे, करोडो रुपयेही तिची भरपाई करू शकत नाहीत”, असे शेतकऱ्यांनी स्पष्ट केले. मात्र तहसीलदार आणि एसडीओ हे शेतकऱ्यांच्या बाजूने न उभे राहता कंपनीच्या बाजूनेच बोलत असल्याचा आरोप ग्रामस्थांनी केला असून या गैरव्यवहाराविरोधात तीव्र नाराजी व्यक्त केली आहे.

“मृत व्यक्तीच्या नावावर बनावट ठराव?” — ग्रामस्थांचा आरोप

ग्रामस्थांनी सांगितले की, कंपनीकडून शेतजमीन मिळवण्यासाठी काही ठराव, कागदपत्रे आणि तडजोडीचे करार बनावटरीत्या तयार करून ठेवण्यात येत आहेत.

अत्यंत गंभीर आरोप असा की —

“ज्या व्यक्तीचे निधन झाले आहे, त्याच्या नावाने ‘सह्या’ दाखवून कंपनीला कागदपत्रे देण्यात आली”

असा प्रकार घडल्याचे ग्रामस्थांनी पत्रकार परिषदेत स्पष्ट केले.

या बनावट कागदपत्रांचा आधार घेऊन कंपनीने जमीन ताब्यात घेण्याची प्रक्रिया पुढे नेण्याचा प्रयत्न होत असल्याचे आरोप करण्यात आले.

नोटिसांचा पाऊस आणि मानसिक छळ

ग्रामस्थांच्या म्हणण्यानुसार काही शेतकऱ्यांना —

वारंवार नोटिसा,

अधिकारी–दलालांचे अचानक धाडसदृश दौरे,

“जमीन द्या, नाहीतर कारवाई” अशा स्वरातील दबाव,

यामुळे शेतकरी कुटुंबांवर प्रचंड मानसिक ताण निर्माण झाला. याच तणावाच्या पार्श्वभूमीवर दोन जणांचा मृत्यू झाला असल्याचा दावा ग्रामस्थांनी केला.

“आम्हाला न्याय मिळाला असता, दडपशाही थांबली असती, तर हे जीव गेले नसते” — अशा भावनिक शब्दांत कुटुंबीयांनी आपली भूमिका मांडली.

ग्रामस्थांत संताप; मोठ्या आंदोलनाची तयारी

गावात तणावपूर्ण वातावरण असून ग्रामस्थ आता मोठ्या आंदोलनाच्या तयारीत आहेत.

त्यांची मागणी —

जमीन हडपण्याचा खेळ तत्काळ थांबवावा

मृत्यू प्रकरणांची निष्पक्ष चौकशी व्हावी

बनावट कागदपत्रांचा तपास करावा

प्रशासनाने ग्रामस्थांच्या बाजूने उभे राहावे

ग्रामस्थांचे स्पष्ट मत —

“जीवन आणि जमिनीवर अन्याय सहन करणार नाही. आम्हाला न्याय हवा, दडपशाही नव्हे.”

कंपनी व प्रशासनाच्या प्रतिक्रियेची प्रतीक्षा

या गंभीर आरोपांवर लॉयड मेटल अथवा प्रशासनाकडून अधिकृत प्रतिक्रिया मिळालेली नाही.

ग्रामस्थांनी केलेले आरोप अतिशय गंभीर असल्याने शासनस्तरावर चौकशी सुरू होण्याची मागणी

पत्रकार परिषदेला कोनसरी येथील रोशन कोटरंगे, विकास मोहुर्ले , सोनू कावळे, कुशाब गोडबोले, अभय गद्दे, रोहन मडावी, दशरथ करपते, आनंदराव मडावी, भाऊजी कावळे, सुरेश करपते व इतर ग्रामस्थ उपस्थित होते