विश्वशांती विद्यालय कुनघाडा येथे पत्रकार दिन उत्साहात साजरा; ‘व्हॉइस ऑफ मीडिया’ चामोर्शीतर्फे सामाजिक बांधिलकीचे दर्शन

सोनू वाळके,उपसंपादक, लोकवाद न्युज.

चामोर्शी (प्रतिनिधी):
मराठी वृत्तपत्रसृष्टीचे जनक आचार्य बाळशास्त्री जांभेकर यांच्या जयंतीनिमित्त साजरा होणाऱ्या पत्रकार दिनाचे औचित्य साधून ‘व्हॉइस ऑफ मीडिया’ तालुका चामोर्शी यांच्या वतीने विश्वशांती विद्यालय तथा उच्च माध्यमिक विद्यालय, कुनघाडा (रै.) येथे मंगळवार दि. ६ जानेवारी २०२६ रोजी भव्य कार्यक्रमाचे आयोजन करण्यात आले.
या कार्यक्रमाच्या अध्यक्षस्थानी प्राचार्य मेश्राम होते. तर प्रमुख अतिथी म्हणून माजी पंचायत समिती सभापती आनंद भांडेकर व जिल्हा काँग्रेस कमिटी उपाध्यक्ष अनिल कोठारे यांची उपस्थिती होती. पत्रकारितेच्या गौरवासोबतच सामाजिक बांधिलकी जपणाऱ्या उपक्रमांमुळे हा कार्यक्रम विशेष ठरला.
बाळशास्त्री जांभेकर प्रतिमेचे अनावरण
कार्यक्रमाची सुरुवात आचार्य बाळशास्त्री जांभेकर यांच्या प्रतिमेला माल्यार्पण करून करण्यात आली. पत्रकारितेचे मूल्य, सामाजिक जबाबदारी व सत्यनिष्ठा विद्यार्थ्यांपर्यंत पोहोचावी या हेतूने ‘व्हॉइस ऑफ मीडिया’च्या वतीने विद्यालयास बाळशास्त्री जांभेकर यांची प्रतिमा भेट देण्यात आली.
सामाजिक बांधिलकीचा आदर्श — कोसमशील्ले परिवारास मदत
केवळ बातम्यांपुरते मर्यादित न राहता समाजातील दुःखात सहभागी होण्याच्या उद्देशाने, अलीकडेच अपघातग्रस्त झालेल्या कोसमशील्ले परिवाराला संघटनेच्या वतीने आर्थिक मदत प्रदान करण्यात आली. या उपक्रमामुळे पत्रकारितेचा मानवी चेहरा अधोरेखित झाला असून सर्वत्र याचे कौतुक होत आहे.
पत्रकारांचा यथोचित गौरव
तालुक्यातील पत्रकारांच्या कार्याची दखल घेत, उपस्थित सर्व पत्रकारांचा शाल व श्रीफळ देऊन सत्कार करण्यात आला. लोकशाहीचा चौथा स्तंभ म्हणून पत्रकार बजावत असलेल्या जबाबदारीबद्दल मान्यवरांनी गौरवोद्गार काढले.
मान्यवरांचे मनोगत
यावेळी बोलताना वक्त्यांनी सांगितले की, बाळशास्त्री जांभेकर यांनी घालून दिलेली पत्रकारितेची परंपरा आजही तितक्याच प्रखरपणे जपण्याची गरज आहे. केवळ बातमी देणे नव्हे, तर समाजातील गरजू घटकांना न्याय मिळवून देणे आणि सामाजिक कार्यात सक्रिय सहभाग घेणे हीच खरी पत्रकारिता असल्याचे मत व्यक्त करण्यात आले.
उपस्थित मान्यवर
या कार्यक्रमास आनंद भांडेकर (माजी सभापती, चामोर्शी पंचायत समिती), धर्मेंद्र दुधे, प्रा. उल्हास आखाडे, प्रशांत मोपिडवार, प्रा. जल्लेवार, प्रा. देवानंद दुधे, प्रा. पायल कुंदावर, प्रा. सारिका साळवे, प्रा. जितेंद्र कुनघाडकर, शिक्षक व कर्मचारी वृंद, तसेच ‘व्हॉइस ऑफ मीडिया’ चामोर्शी तालुका संघटनेचे पदाधिकारी विनोद खोबे, पुंडलिक भांडेकर, अध्यक्ष(VMO) ,सोनू वाळके, अरुण गव्हारे, धनराज वासेकर, मारोती बारसागडे, उमेश गाजपल्लीवर, प्रफुल कोटांगले, दिलखूष कुनघाडकर यांच्यासह मोठ्या संख्येने विद्यार्थी उपस्थित होते.
कार्यक्रमाचे संचालन गुरुदास कन्नके, आभार प्रदर्शन उमेश गाजपल्लीवर यांनी केले.