गडचिरोली जिल्हाधिकारी यांनी घेतला स्ट्राँग रूम व मतमोजणी व्यवस्थेचा आढावा

सोनू वाळके लोकवाद न्युज. नगरपरिषद सार्वत्रिक निवडणुकांच्या पार्श्वभूमीवर २१ डिसेंबर रोजी होणाऱ्या मतमोजणीसाठी उभारण्यात आलेल्या व्यवस्थेची जिल्हाधिकारी अविश्यांत पंडा यांनी आज कृषी महाविद्यालय, गडचिरोली येथे सखोल पाहणी केली. यावेळी मतमोजणी केंद्र, मतदान यंत्रांच्या सुरक्षा कक्ष (स्ट्राँग रूम) तसेच ईव्हीएम साठवणूक व्यवस्थेचा त्यांनी सविस्तर आढावा घेतला.
पाहणीदरम्यान स्ट्राँग रूममधील प्रवेश-निर्गम व्यवस्था, सीसीटीव्ही निगराणी, सुरक्षारक्षकांची तैनाती, अग्निसुरक्षा उपाययोजना आणि ईव्हीएम साठवणूक कक्षातील सुरक्षिततेच्या सर्व बाबींची तपासणी करण्यात आली. मतमोजणी प्रक्रियेदरम्यान कोणतीही त्रुटी उद्भवू नये, यासाठी निवडणूक आयोगाच्या मार्गदर्शक सूचनांचे काटेकोर पालन करण्याचे निर्देश जिल्हाधिकाऱ्यांनी संबंधित अधिकाऱ्यांना दिले.
तसेच कृषी महाविद्यालय परिसरातील बाह्य सुरक्षा व्यवस्था, वाहतूक नियंत्रण, प्रवेश नियंत्रण आणि मतमोजणीच्या दिवशी कायदा-सुव्यवस्था अबाधित ठेवण्यासाठी करण्यात आलेल्या नियोजनाचीही त्यांनी तपासणी केली. मतमोजणी प्रक्रिया पारदर्शक, सुरक्षित व शांततेत पार पडावी, यासाठी सर्व यंत्रणांनी समन्वयाने काम करावे, असे त्यांनी स्पष्ट केले.
या पाहणीवेळी नगरपरिषद निवडणूक निर्णय अधिकारी श्रीमती स्मिता बेलपत्रे, मुख्याधिकारी सूर्य पिदुरकर यांच्यासह पोलीस, महसूल व निवडणूक विभागातील संबंधित अधिकारी उपस्थित होते.