सोनू वाळके,उपसंपादक, लोकवाद न्युज.
मूल : शिक्षण, संस्कार आणि जनसेवेचा सुंदर संगम जपणाऱ्या चैताली मद्रीवर यांना बहुजन समाज पार्टीकडून मूल नगराध्यक्षपदाची अधिकृत उमेदवारी जाहीर करण्यात आली आहे. समाजकार्यातील सक्रिय सहभाग, सर्वसमावेशक विकासाचा दृष्टीकोन आणि लोकाभिमुख काम करण्याची आगळीवेगळी उमेद यामुळे त्यांची निवड निश्चित झाल्याचे पक्षाच्या सूत्रांनी सांगितले.
चैताली मद्रीवर यांनी गेल्या काही वर्षांत महिला सक्षमीकरण, शिक्षणविस्तार, स्वच्छता, वंचित घटकांच्या हक्कांसाठी केलेल्या कामामुळे स्थानिक पातळीवर भक्कम जनाधार निर्माण केला आहे. नागरिकांमध्ये विश्वास आणि सकारात्मक नेतृत्वाची प्रतिमा तयार करण्यात त्यांनी मोठे यश मिळवले आहे.
नगरपरिषद निवडणूक 2025 ला वेग येत असताना बसपाकडून मिळालेली ही उमेदवारी राजकीय समीकरणात महत्त्वाची ठरणार असून, आगामी काळात मूल शहराच्या विकासाचे नवे दिशानिर्देश ठरवण्याची क्षमता चैताली मद्रीवर यांच्यात असल्याचे पक्ष नेतृत्वाने अधोरेखित केले.
पक्षाकडून उमेदवारीची घोषणा होताच समर्थकांमध्ये उत्साहाचे वातावरण असून, शहरात अभिनंदनाच्या संदेशांचा वर्षाव सुरू आहे. आगामी काही दिवसांत त्यांच्या प्रचारयात्रेला देखील औपचारिक सुरुवात होणार असल्याची माहिती मिळाली आहे.
उमेदवारी जाहीर होताच चैताली मद्रीवर यांनी उत्साही आणि जोशपूर्ण प्रचार मोहिमेला वेग दिला आहे. बीएसपीचे पदाधिकारी आणि कार्यकर्त्यांना एकत्र बांधत त्यांनी प्रभागात दैनंदिन भेटीगाठींची मालिका सुरू केली आहे. स्थानिक प्रश्न, नागरिकांच्या गरजा आणि विकासाचा रोडमॅप याबाबत त्यांनी थेट जनतेशी संवाद साधण्यावर भर दिला आहे.
“विकास, स्वच्छ प्रशासन आणि जनतेकेंद्रित कारभार हेच माझे मुख्य ध्येय आहे. जनतेची सेवा हीच आमची प्राथमिकता असून, विश्वासाचे बंध अधिक मजबूत करत मूल शहराच्या विकासात नवीन पर्वाची सुरुवात करणे हेच माझे उद्दिष्ट आहे,” अशा स्पष्ट शब्दांत चैताली मद्रीवर यांनी आपली भूमिका मांडली.
सध्या मूल नगरपरिषद निवडणुकीची वातावरणनिर्मिती जोमात असताना, चैताली मद्रीवर यांचा सेवाभाव, बीएसपीची संघटनशक्ती आणि वाढता जनाधार हे त्यांच्या उमेदवारीला मोठी ताकद ठरणार असल्याची चर्चा राजकीय वर्तुळात जोरात आहे. आगामी दिवसांत त्यांच्या प्रचार मोहीमेचा वेग आणखी वाढणार असून, या निवडणुकीत त्यांची कामगिरी सर्वांच्या नजरा खेचणार, असेही निरीक्षकांचे मत आहे.
