🚨 तळोधी येथे भीषण अपघात : 4 ठार, 11 जखमी

🚨 तळोधी येथे भीषण अपघात : 4 ठार, 11 जखमी

जखमींवर तातडीने उपचार करा – जिल्हाधिकारी अविश्यांत पंडा यांचे निर्देश

गडचिरोली (प्रतिनिधी) :

गडचिरोली-चामोर्शी मार्गावरील तळोधी येथे स्कॉर्पिओ व ट्रॅव्हल्स वाहनामध्ये झालेल्या भीषण अपघातात चार जणांचा जागीच मृत्यू झाला असून 11 जण गंभीर जखमी झाले आहेत. या घटनेमुळे परिसरात हळहळ व्यक्त होत आहे.

ही दुर्घटना आज सायंकाळी सुमारे 6 वाजताच्या सुमारास तळोधी येथील नवीन पेट्रोल पंपाजवळ घडली. कुरुल-रामपूर येथून भाडभीडी येथे लग्नासाठी निघालेल्या स्कॉर्पिओ (MH 46 P 5392) या वाहनाची गडचिरोलीकडून येणाऱ्या प्रवीण टुर्स अँड ट्रॅव्हल्स (MH 15 CK 5005) या वाहनाशी समोरासमोर जोरदार धडक झाली.

घटनेची माहिती मिळताच जिल्हाधिकारी अविश्यांत पंडा यांनी तात्काळ जिल्हा रुग्णालयात भेट देऊन जखमींची विचारपूस केली. यावेळी आमदार डॉ. मिलिंद नरोटे, अपर पोलीस अधीक्षक एम. रमेश व श्री गोकुल, तसेच जिल्हा शल्य चिकित्सक डॉ. वर्षा लहाडे उपस्थित होते.

जिल्हाधिकाऱ्यांनी डॉक्टरांना स्पष्ट निर्देश देत जखमींवर तातडीने व गुणवत्तापूर्ण उपचार करण्यास सांगितले. आवश्यक औषधे, मनुष्यबळ व वैद्यकीय सुविधा त्वरित उपलब्ध करून देण्याच्या सूचनाही त्यांनी दिल्या. तसेच जखमींच्या नातेवाईकांना सर्वतोपरी मदत करण्याचे आदेश दिले.

अपघातातील जखमींना तळोधी ग्रामीण रुग्णालयात प्राथमिक उपचारानंतर पुढील उपचारासाठी गडचिरोली जिल्हा सामान्य रुग्णालयात हलविण्यात आले आहे.

जिल्हाधिकाऱ्यांनी मृतांच्या कुटुंबीयांना धीर देत प्रशासन त्यांच्या पाठीशी ठामपणे उभे असल्याचा विश्वास दिला.

⚫ मृतांची नावे : अनिकेत बर्लावार (वय 26, भाडभीडी) , आरोही मोगरकर (वय 8, गट्टेगुडा), सुमन गव्हारे (वय 60, कुणघाडा), विमलाबाई गव्हारे (वय 60, कुणघाडा)

🔴 जखमींची नावे : (1) गुरुदेव कुणघाडकर, (2) सुधाकर कुणघाडकर, (3) वेदांत वैरागडे, (4) प्रतिमा मानमुडकर, (5) निखिल दराडे, (6) संजय वैरागडे,(7) कुणाल कन्नाके, (8) रेखा चलाख, (9) अमर चलाख, (10) देवाजी गव्हारे, (11) गुरुदास वासेकर