दुबईत सुवर्णझळाळी : आष्टीची श्वेता कोवे एशियन युथ पॅरा गेम्स 2025 मध्ये अव्वल

सोनू वाळके,उपसंपादक, लोकवाद न्युज.

गडचिरोली

दुबई येथे पार पडलेल्या एशियन युथ पॅरा गेम्स 2025 तिरंदाजी स्पर्धेत महिला गटातून सुवर्णपदक पटकावत वन वैभव शिक्षण मंडळ, अहेरी अंतर्गत महात्मा ज्योतिबा फुले कला महाविद्यालय, आष्टीची विद्यार्थिनी कु. श्वेता भास्कर कोवे हिने भारतासह गोंडवाना विद्यापीठ, गडचिरोलीचे नाव आंतरराष्ट्रीय पातळीवर उज्वल केले आहे.
या स्पर्धेत श्वेताने आशियातील विविध देशांच्या खेळाडूंना मागे टाकत उत्कृष्ट कामगिरी केली.

कठोर परिश्रम, सातत्य, चिकाटी आणि आत्मविश्वासाच्या बळावर श्वेताने हे यश संपादन केले. तिच्या यशामागे प्रमुख मार्गदर्शक प्रा. डॉ. श्याम कोरडे सर यांचे मोलाचे योगदान असून त्यांनी सातत्याने योग्य प्रशिक्षण व प्रोत्साहन दिले.

श्वेताच्या ऐतिहासिक यशामुळे महाविद्यालयात आनंदाचे वातावरण पसरले असून प्राचार्य, प्राध्यापक वृंद, शिक्षक, विद्यार्थी तसेच संस्थेच्या वतीने कु. श्वेता कोवे व प्रा. डॉ. श्याम कोरडे सर यांचे मनःपूर्वक अभिनंदन करण्यात आले आहे.
या यशामुळे इतर विद्यार्थ्यांनाही नवी प्रेरणा मिळाली असून श्वेताच्या पुढील क्रीडा कारकिर्दीसाठी सर्व स्तरांतून शुभेच्छांचा वर्षाव होत आहे. भविष्यातही तिने देशासाठी अशीच उज्वल कामगिरी करावी, अशी अपेक्षा व्यक्त करण्यात येत आहे.