चामोर्शीत तरुण पिढी ‘गांजा व दारू’च्या आहारी!    गांजा आणि दारूविरुद्ध पोलिसांनी तातडीने मोहीम राबवावी,पालक आणि समाजात चिंतेचे वातावरण.

सोनू वाळके,उपसंपादक, लोकवाद न्युज.

पोलिसांनी तातडीने मोहीम राबवून समाजासाठी मुख्य भूमिका बजावावी.

गडचिरोली(चामोर्शी ): शहरातील तरुण पिढी मोठ्या प्रमाणावर ‘गांजा’ व ‘दारू’च्या विळख्यात अडकत असल्याची धक्कादायक परिस्थिती समोर येत आहे. काही विशिष्ट भागात रात्रीच्या वेळी तरुण टोळक्यांचा अड्डा बनत असून, खुलेआम गांजा व विक्री व सेवनाचे प्रकार सुरू असल्याची माहिती नागरिकांकडून समोर येत आहे. या वाढत्या व्यसनाधीनतेमुळे पालकांमध्ये भीतीचे वातावरण निर्माण झाले आहे.

शहरातील गल्ल्या ‘स्मोक झोन’मध्ये बदलल्या?

स्थानिक नागरिकांच्या मते, काही दुकानांच्या आडोशाला, अंधाऱ्या गल्ल्यांमध्ये, नदीकाठावर किंवा निर्जन जागांवर रात्रीच्या वेळी तरुणांची गर्दी दिसते. त्या ठिकाणी गांजा ओढण्याचे, विक्रीचे आणि नव्या मुलांना व्यसनाच्या जाळ्यात ओढण्याचे प्रकार बिनधास्तपणे घडत असल्याची तक्रार करण्यात येत आहे.

काही पालकांनी सांगितले की, शाळा-कॉलेज परिसरातही काही बाहेरगावातून येणारे संशयित व्यक्ती विद्यार्थ्यांना उद्देशून व्यसनाचे पदार्थ पुरवत असल्याची चर्चा जोरात आहे. यामुळे अल्पवयीन मुलांमध्येही हा विषारी ट्रेंड पसरत असल्याचे दिसत आहे.

गांजाचे सेवन आणि विक्री रोखण्यासाठी कडक कायदे असतानाही चामोर्शीत या विरोधात कार्यक्षम कारवाई होत नसल्याचा प्रश्न नागरिकांनी उपस्थित केला आहे. काही किरकोळ तपासणी सोडली तर मोठ्या रॅकेटवर संयुक्त मोहिम, पाळत, नाकाबंदी किंवा गुप्त पथके—यांचा अभाव प्रकर्षाने जाणवतो.

नागरिकांचे म्हणणे आहे—

“हे प्रकार सुरूच राहिले तर उद्या संपूर्ण पिढी नशेच्या आहारी जाईल. पोलीस प्रशासन  जागे होणार कधी?”

समाजात भीती—शाळा, कॉलेजातील विद्यार्थी धोक्यात

गांजा सेवनामुळे तरुणांमध्ये नैराश्य, हिंसक प्रवृत्ती, गुन्हेगारी व मानसिक अस्थिरता वाढण्याचा धोका वाढतो. काही प्रसंगी घराघरात तणाव व आर्थिक नुकसानही होत असल्याचे अनुभव नागरिकांनी सांगितले.

पालकांची आणि नागरिकांची ठाम मागणी

शहरातील सर्व संवेदनशील ठिकाणी रात्रीची विशेष गस्त

शाळा-कॉलेज परिसरात गुप्त पथकाची नेमणूक

गांजा विक्रेत्यांवर कठोर गुन्हे दाखल

तरुणांसाठी जनजागृती मोहीम

व्यसनमुक्ती केंद्रांशी समन्वय

“चामोर्शीला व्यसनमुक्त करणे हीच वेळेची गरज”

तरुण पिढी बिघडण्यापूर्वी पोलिसांनी व्यापक आणि सातत्यपूर्ण कारवाई करावी, अशी तीव्र मागणी शहरातील नागरिकांकडून होत आहे.

गांजाच्या वाढत्या सावटाने चामोर्शी शहर धोक्याच्या उंबरठ्यावर उभे आहे—आता तरी पोलीस प्रशासनाने जागे होऊन व्यसनमुक्त चामोर्शीसाठी कठोर पावले उचलावीत, असा इशारा नाराज नागरिकांकडून दिला जात आहे.