सायबर पोलिसांचा मोठा यश ! गडचिरोली सायबर पोलीस ठाण्याने शोधून काढले 13.97 लाखांचे 90 मोबाईल; तक्रारदारांना सुपूर्द.

सोनू वाळके,उपसंपादक, लोकवाद न्युज.

गडचिरोली | दि. 12 नोव्हेंबर :

सायबर गुन्ह्यांविरोधात प्रभावीपणे कारवाई करत गडचिरोली सायबर पोलीस ठाण्याने पुन्हा एकदा उल्लेखनीय कामगिरी केली आहे. एकूण ₹13,97,399/- किंमतीचे 90 हरवलेले मोबाईल फोन शोधून काढत पोलीस अधीक्षक श्री. नीलोत्पल यांच्या हस्ते संबंधित तक्रारदारांना परत करण्यात आले.

सन 2025 या वर्षात आतापर्यंत, गडचिरोली सायबर पोलीस ठाण्याने एकूण 215 मोबाईल फोन तक्रारदारांना परत दिले असून त्यांची एकूण किंमत ₹33,64,560/- इतकी आहे.

या उपक्रमामुळे नागरिकांमध्ये पोलिसांबद्दल विश्वास आणि समाधान वाढले आहे. मोबाईल शोधण्यासाठी सायबर पोलीस दलाने तांत्रिक तपास, आयएमईआय ट्रॅकिंग आणि मोबाईल नेटवर्कचा वापर करून ही कार्यवाही केली.

सायबर पोलीस ठाण्याच्या या यशाबद्दल पोलीस अधीक्षक नीलोत्पल यांनी संबंधित अधिकारी आणि कर्मचाऱ्यांचे कौतुक केले. तसेच नागरिकांनी मोबाईल हरवल्यास त्वरित सायबर पोलीस ठाण्यात तक्रार नोंदवावी, असे आवाहनही त्यांनी केले.