🔴 जिल्हाधिकारी कार्यालय व पोलीस ठाण्यात सामाजिक कार्यकर्त्यावर अन्याय झाल्याचा आरोप; निष्पक्ष चौकशीची मागणी

🔴 जिल्हाधिकारी कार्यालय व पोलीस ठाण्यात सामाजिक कार्यकर्त्यावर अन्याय झाल्याचा आरोप; निष्पक्ष चौकशीची मागणी

लोकवाद प्रतिनिधी | वर्धा

वर्धा येथील सामाजिक कार्यकर्ते तथा अनुसूचित जाती (SC) बौद्ध प्रवर्गातील नागरिक विक्की महेंद्र सवाई यांनी उपजिल्हाधिकारी तथा निवासी जिल्हाधिकारी संजय जाधव यांची भेट घेऊन निवेदन सादर करत, जिल्हाधिकारी कार्यालय व वर्धा शहर पोलीस ठाण्यात स्वतःसोबत झालेल्या कथित अन्याय, मारहाण व जातीय अपमान प्रकरणाची निष्पक्ष चौकशी करून संबंधित पोलीस अधिकाऱ्यांवर कठोर कारवाई करण्याची मागणी केली आहे.

सदर निवेदनात दिनांक 18 व 19 फेब्रुवारी 2025 रोजी घडलेल्या घटनांचा उल्लेख करण्यात आला आहे. विक्की सवाई यांच्या म्हणण्यानुसार, “वर्धा येथे शासकीय वैद्यकीय महाविद्यालय सुरू करण्यात यावे” या मागणीसाठी ते जिल्हाधिकारी कार्यालयात निवेदन देण्यासाठी गेले होते. त्यावेळी कार्यालयातील अनुरक्षक पोलीस अधिकारी क्षितिज अशोकराव रोकडे यांनी त्यांना धमकी दिल्याचा आरोप करण्यात आला आहे.

यानंतर काही वेळाने पुन्हा जिल्हाधिकारी कार्यालयात गेल्यानंतर संबंधित अधिकाऱ्याने त्यांच्यावर हल्ला करून अंदाजे 30 हजार रुपये किमतीचा मोबाईल हिसकावून घेतला, शिवीगाळ केली व मारहाण केल्याचा गंभीर आरोप त्यांनी केला आहे. ही संपूर्ण घटना जिल्हाधिकारी कार्यालयातील सीसीटीव्ही कॅमेऱ्यात कैद झाल्याचा दावा देखील त्यांनी निवेदनात केला आहे.

घटनेनंतर वर्धा city पोलीस ठाण्यात तक्रार नोंदविण्यासाठी गेल्यावर पोलिसांनी तक्रार स्वीकारली नाही, उलट त्यांना व त्यांच्या आईला शिवीगाळ व जातीय अपमानास सामोरे जावे लागल्याचा आरोप करण्यात आला आहे. तसेच संबंधित पोलीस अधिकाऱ्यांनाच पोलीस ठाण्यात बोलावून त्यांच्या विरोधात खोटा गुन्हा दाखल करण्यात आल्याचेही त्यांनी म्हटले आहे.

तसेच 19 फेब्रुवारी 2025 रोजी पोलीस ठाण्यात चौकशीदरम्यान त्यांना मारहाण करण्यात आली, जातीवाचक शिवीगाळ करण्यात आली तसेच पायांच्या तळव्यांवर पट्ट्याने मारण्यात आल्याचा गंभीर आरोपही निवेदनात करण्यात आला आहे.

या संपूर्ण प्रकरणाची निष्पक्ष चौकशी करून जिल्हाधिकारी कार्यालय व वर्धा शहर पोलीस ठाण्यातील सीसीटीव्ही फुटेज जतन करण्यात यावे, तसेच संबंधित आरोपी पोलीस अधिकाऱ्यांवर अनुसूचित जाती-जमाती अत्याचार प्रतिबंधक कायदा व इतर लागू कायद्यांनुसार कठोर कारवाई करण्यात यावी, अशी मागणी विक्की महेंद्र सवाई यांनी प्रशासनाकडे केली आहे.

या निवेदनाच्या प्रतिलिपी पोलीस अधीक्षक वर्धा, पोलीस आयुक्त नागपूर, पोलीस महासंचालक महाराष्ट्र राज्य मुंबई, महाराष्ट्र राज्य मानव अधिकार आयोग तसेच महाराष्ट्र राज्य अनुसूचित जाती-जमाती आयोग यांना देण्यात आल्या आहेत.