🟥 “गोदामाचा प्रश्न सुटला; अखेर मूलमध्ये मका खरेदीला मुहूर्त”

🟥 “गोदामाचा प्रश्न सुटला; अखेर मूलमध्ये मका खरेदीला मुहूर्त”

राकेश रत्नावार यांची शेतकऱ्यांना दिलासा देत अन्याय दूर करण्याची भूमिका; आधारभूत दराने खरेदीला प्रारंभ

मूल लोकवाद प्रतिनिधी : रब्बी हंगाम २०२५-२०२६ मधील मका उत्पादक शेतकऱ्यांसाठी दिलासादायक ठरलेल्या शासकीय मका खरेदी प्रक्रियेचा शुभारंभ मंगळवार (दि.१३) रोजी शासकीय धान्य गोदाम, मूल येथे उत्साहात पार पडला. कृषी उत्पन्न बाजार समिती, मूल यांच्या माध्यमातून ही खरेदी शासकीय आधारभूत दराने करण्यात येत आहे.

मका खरेदी शुभारंभ प्रसंगी बाजार समितीचे सभापती राकेशभाऊ रत्नावार यांच्या उपस्थितीत राजगड येथील मका उत्पादक शेतकरी हरिदास ठाकूर यांच्या हस्ते काट्टा पूजन करण्यात आले. त्यानंतर प्रथम मका विक्री करणारे शेतकरी म्हणून त्यांचा शाल व श्रीफळ देऊन सत्कार करण्यात आला.

यावेळी बाजार समितीचे संचालक अमोलभाऊ बच्चुवार, तुलाराम घोगरे, सुमित आरेकर, जालिंद्र बांगरे, चंदा कामडी, किरण पोरड्डीवार यांच्यासह अडते, व्यापारी, शेतकरी व बाजार समितीचे कर्मचारी मोठ्या संख्येने उपस्थित होते.

जिल्हा मार्केटिंग अधिकारी, चंद्रपूर यांच्या माध्यमातून कृषी उत्पन्न बाजार समिती, मूल येथे शासकीय आधारभूत दराने मका खरेदीस मंजुरी मिळाली असून आजअखेर १०५ शेतकऱ्यांनी ऑनलाईन नोंदणी केली आहे. मात्र, मका खरेदीसाठी शासकीय धान्य गोदाम उपलब्ध नसल्याने अनेक दिवसांपासून खरेदी प्रक्रिया रखडली होती. त्यामुळे तालुक्यातील मका उत्पादक शेतकऱ्यांमध्ये नाराजीचे वातावरण निर्माण झाले होते.

दरम्यान, शेतकऱ्यांवर अन्याय होऊ नये यासाठी सभापती राकेशभाऊ रत्नावार यांनी पुढाकार घेत दि.११ मे रोजी बाजार समितीच्या संपूर्ण संचालक मंडळासह तहसीलदार मोरे मॅडम यांना निवेदन सादर केले होते. तालुक्यातील नोंदणीकृत शेतकऱ्यांचा मका तात्काळ खरेदी करण्यासाठी शासकीय गोदाम उपलब्ध करून द्यावे, अशी मागणी करण्यात आली होती.

प्रशासनाने सकारात्मक भूमिका घेत शासकीय धान्य गोदाम उपलब्ध करून दिल्यानंतर अखेर मका खरेदीचा मार्ग मोकळा झाला. यामुळे तालुक्यातील मका उत्पादक शेतकऱ्यांना मोठा दिलासा मिळाला आहे.

“शेतकऱ्यांनी नोंदणी केलेला मका शासकीय धान्य गोदामात विक्रीसाठी आणावा. बाजार समिती शेतकऱ्यांच्या पाठीशी ठामपणे उभी आहे,” असे आवाहन सभापती राकेशभाऊ रत्नावार यांनी यावेळी केले.